آفتاب عالم قریشی* غزل

*غزل*

*آفتاب عالم قریشی*

*ہوا کے ساتھ چراغوں کو ہم کنار نہ کر*

*ہوا کا دامنِ بے عیب تار تار نہ کر*

*یہ احترام کا رشتہ بڑا ضروری ہے*

*فقط اسی کو نبھا یار مجھ سے پیار نہ کر*

*مجھے نظر کے تحفظ میں رکھ مرے خالق*

*مجھے کسی بھی زمانے پہ آشکار نہ کر*

*ضرورتوں کو ضرورت کے پیراہن میں سما*

*سہولتوں کے لبادے کو داغ دار نہ کر*

*میں اپنے ساتھ تسلی سے وقت کاٹتا ہوں*

*سو اپنے ساتھ تو ہرگز مجھے شمار نہ کر*

*میں خاک زادہ ہوں ذروں سے ہم کناری ہے*

*مجھے فلک کے ستاروں سے استوار نہ کر*

*بس اپنی آنکھ میں اپنے ہی خواب سجتے ہیں*

*کسی کے خواب کا اس درجہ انتظار نہ کر*

*خود اپنے درد کی دولت ہے محترم عالم*

*کسی کے درد کی دولت پہ اعتبار نہ کر*